الناس ما تصدق تضحك
ع العاقل والمجنون
وكتر الهم يعلم
الهم بيصنع ضحكة
وساعات نضحك بهموم
وانا فاهم مش دلدول
الناس فى الشارع تايهة
من كتر البيض والفول
بقى كله يكلم بعضه
ومفيش عاقل مسطول
مسطول ازاى يحسبها
او يضرب عرض فى طول
او يرجع تانى بضهره
للفايدة بتاع زغلول
الفول عمالولو حكاية
دفنوه فى الارض بدوده
علشان يرجع لجدوده
والفولة يجيبها الغول
والفول يتكلم صينى
وساعات يرطن بلاتينى
ويقولو الشعب المصرى
هايقفل عقله الفول
ويلف فى دايرة حيرة
ع القهوة ع التعميرة
وحاجات من غير ما نقول
وانا فاهم انك فاهم
وصاحى ومش دلدول
ماتقولش الحزب الحاكم
لاحسن يخدك لمحاكم
ويصارع فيك ويلاكم
والتهمة حكاية الفول
وحاجات بتلف فى دايرة
وازاى بتقول وتقول
وازاى تجرا علانا
والراى ماهوش مكفول
مع انى القول ده هواية
ولكل هواية اصول
واصول القول ياسيادنا
متكنش ف يوم مخبول
يا تقول عالحاصل فعلا
يا بلاش من اصله تقول
من اول ادم ابونا ولغاية
ناس دبحونا
وحبل القول موصول
وحكاية تجيب ف حكاية
كتكوت يدى لحداية
واهطل بيجيب مسطول
القول يا اخوانا غواية
كشاف للناس ومراية
ودى ميزة فن القول
بيخش القصة بفولة
يختم بتتار ومغول
ويلم الكل فى الصرة
والكلمة ان كانت مرة
احسن من عدم القول
والساكت مش انسان
وان كان انسان فاجبان
المولى ادله لسان
لكن مقدرش يقول
ويقولوا الشعر هواية
لكن فى الاصل غواية
يشرح فى الحال والواقع
وساعات فوق المعقول
ليست هناك تعليقات:
إرسال تعليق
اكتب تعليق