فرشة والوان

فرشة والوان 

ورقة وملامح بشر 

وهم ابتسامة باى 

لون 

على خط اسود مستقيم 

موه ملامح اى شر 

حط  ابتسامة باى شكل 

فوق شفايفه 

وامسح الدمع فى عنيه 

انت  حر 

خفف الالوان  هنا 

حط شمس  ع اليمين 

وفى شماله ضل 

حتى لو متلخبطين 

ايوه  كدا 

وعشان يبان فيها 

السلام 

ارسم  هنا اغصان  زيتون 

وحمامة طايرة فى السما 

واقفل الاطار بدم 

وفى نص نص  المنتصف 

ارسم عمى  

عشان تشوفه اى عين  

والصورة  تقعد ميت سنه 

ناقصة السلام  

مع انى شكل الرسم تم   

صندوق قديم

     صندوق ستى القديم 

شايلة فيه وجع السنين 

وكام صورة من ريحة العدم 

ويدوب تشيل الغطا  

ريحة السنين  تتشم 

فى حاجات قديمة 

من  الزمان  تتلم 

وتقولى شوف  

فى الجنب  ضحكة 

وفى جنب  تانى  الهم 

لحظة  فضول 

امد  ايدى. تقولى حاسب 

ع السنين متبحترة 

افتح كفوفك  لم  

ضحكة م السنين البكر 

انا كنت شايلة ضحكتين 

علشان يشلوا دمعتين 

الموت 

صندوقى شايل من الزمن 

ريحة البيوت 

ودى سبحة سابحة  فى الدنيا 

والملكوت 

ودى غوشة فالصو  

زى السنين  الصعب 

وابتسامة  موت  

وده راديو قديم ماتوا 

كل اللى غنوم  فيه 

واللى قروا النشرة 

وده فستان الفرح 

باقى ع العشرة 

ودى علبة احمر  لونت 

كام شهر 

مطرح خطوط الزمان .

قربت اشوف 

بصيت لقيت الزمن 

ضارب فى قلب الخشب 

خطين  ضى بينوروا 

الصندوق 

واربع  زوايا  اتواعدوا 

واتباعدوا 

فاتحين  طريق للضى 

يدخل ويبدد الضلمة 

ويكشف سنين العمر 

وتقولى ستى  عارف 

العمر مش كلمة وعدد

لو بالسنين  انا مت  

عارف  صدرى  لما يضيق 

اجى وافتح الصندوق 

وكانى باخد  نفس 

او حتى  جرعة ونس 

والقانى فى الماضى 

وحكم الزمان  قاضى 

ومهيش حكاية  موت  

شايف ادى السنين 

واقفين  والدنيا ماشية 

الدنيا كدابة  زى الدموع 

مغلوبة وغلاابة

وتغير وشوش الناس 

ساعات ملايكة 

وساعات  ديابة 

وساعات وشوش ماسخة 

وممسوخة 

لا هما  ملايكة ولا شياطين 

صندوقى مهوش غريب  

انا  شايلة حته من الزمان 

الحلو 

ومن السنين البيض 

علشان زماننا  يكشف زمانكم 

احنا العقد الملضوم  على خيط 

الرحمة 

وانتوا الفالت زمامكم  

فى الدنيا الزحمة 

ولما بصت لى فى عيونى 

وتقولى مالك  خايف 

من  الريحة  

مش عاجبك صندوقى 

ولا  المسافة بين ذوقك 

وذوقى 

مقدرتش ارد  

مع انى حاجاتها قديمة 

لكن من زمن القيمة 

وقفلنا الصندوق 

بس اكيد  هارجعله 

لما اجمع حاجاتى  والم 

الزمن الفايت  تانى 

محكمة

محكمة 

.........................

بسم الله
 بلا اى شريك 

بسم الشعب الغلبان 

المغلوب 

بسم الحق التايه 

مش قادر يوصل  
  لقلوب 

بسم الشهدا الاحرار 

اللى ضحكوا علينا 

اخدوا الجنه وسابولنا 

النار 

بسم الجتت اللى ساكنها 

رصاص كل الاشرار 

بسم الحلم الشايف بكرة 

بسم العدل وبسم الفكرة 

بسم القوانين والدستير 

من اول فكرة حمورابى

ومرورا  بمينا  واحمس 

وعرابى 

بسم الحاضر بسم الماضى

بسم  التواريخ 

من اول ما عرفنا  السيف 

ولغايه  عصر الصواريخ 

ملعون  الخاين .....

الحته السودا

الحته السودا اللى فى قلبك
بتخلى ملامحك مش هى
وملامحك تكشف اسرار

الحته السودا اللى فى قلبك

مش قادر حد  يحركها ولا طلقة
نار
الحته السودا اللى فى قلبك
محتاجه  قرار

اصل الحكاية

اصل الحكاية 

..............

الحكاية من البداية 

للنهاية

مصر راح تفضل 

قوية 

طول ما فيها مخلصين

بس لو نصبر شويه

وربنا وحده المعين 

الحكاية مش فى مرسى 

او محمد  واسماعين 

الحكاية فى البلد  دى

لسه فيها كدابيين 

كله يتكلم  سياسة 

وكله فاهم فى الرئاسة

وكله يفتى باسم دين 

هو فين الصبر  فين؟

الخلاصة ف المحبة 

ومن حبوب الصبر حبه 

لو حقيقى مسلمين 

اللى يعرف ثورة جابت

ناس ملايكة  يقولى فين 

واللى يعرف ثورة  قادرة

تشيل فسادها  ف طرف 

عين 

حد منكوا  يقولى فين 

حد يعرف ثورة قامت 

كان طريقها  خطوتين ؟

كل شئ بالوعى يمشى 

بس شوف الخطوة  فين 

ثورة يعنى الخطوة اعقل 

ثورة عارفة الخطوة فين

ثورة يعنى تقول وتبدع

واحترام الانسانية  فرض 

عين 

ثورة تبنى  ثورة تزرع

لاجل ياكلوا  الشقيانين 

ثورة تعمل ثورة فينا 

مش مجرد  كلمتين 

بس لازم  نبقى واحد 

امة واحدة  وحلم واحد 

بكرة هطوله الايدين