اجمل بيوت الشعر
امي وابويا
قالولى زمان اجمل
بيوت الشعر
بيت مافوهش جبان
وقالولى خد بالك
لو سبت لعيالك
سيب لهم كلمة متخفش
من سجان
ماتسيبش شىء مايع
تحزن عليه لو بان
خلى الحصان كلمة
والكلمة تبقى حصان
توصل لاخر مدى
خلى الحقيقة تبان
عمر البشر محسوب
فان مت موت واقف
وارفض تعيشه جبان
وعشان كده مخلوق
بحب الحرف
عاشق متيم بالكلام
عرفين بحب الحرف
ليه
الحرف برعم الكلام
والكلمة هى الصولجان
الكلمة سيف
الكلمة من جند اللسان
عارفين بحب الحرف
ليه
الحرف مدخل الكلام
والكلمة فارس ف الميدان
الكلمة منطوق الادان
الكلمة امر ...والامر
كن فالخلق كان
والعمر ماشى ومهما
كان
فان عشت عيش
متكونش مرهون اللسان
وان قلت قول الحق
بالكلمة ممكن تكون عنترة
باصم بسيفه ف الميدان
الكلمة ممكن تكون
قنطرة او سكة للغربان
عارفين بحب الحرف
ليه
الحرف طفل بيان
يكبر ويكبر
يخنق ظلام الجهل
يحبى النهار ويبان
الكلمة دى معجزة
والوصف للرحمن
الصم . البكم . العمى
ومعاهم الى يخاف
من قبضة السجان
ومعاهم اللى يشوف
ساعة ضياع الحق
لكن ما لاوهش لسان
عشان كده الحرف
جنب الحرف دول
بالاساس انسان
والكلمة هى المبتدى
بالامر كن فالخلق
كان
ليست هناك تعليقات:
إرسال تعليق
اكتب تعليق