فى زمان منحوس
تتعب وتحوس
تتحزم وتغنى شبابى
تمسلك عود اخرس مقلوب
يطلعلك كام لحن هبابى
والمطرب يطلع يتحنجل
لو شوفته تثور والدم يفور
تلبس طرطور وتزمر زيه
فى سوق فاضى
والمطرب شيك شكله يبكيك
له عيون برغوت .رقبة كتكوت
م الضحك تموت
لو تسمع وسطه بيترقص؟
ويغنى بصوته الحيانى
فى زمان منحوس تتعب وتحوس
تصبح ملحوس
تتحنجل وتغنى هبابى
تصور كام غنوة شبابى
والكادر يدخل فى الشادر
يلقطلك كام منظر فاجر
فى اللحم الابيض بنتاجر
فى زمان منحوس ..تتعب وتحوس
تتحزم وتغنى شبابى
وغازية بترقص للغازى
واللابس يحقد على العارى
ضيعتوا السابق بالاتى
وعدش لا سيكة ولا بياتى
وخرمتوه الكوز ف زمان منحوس
نتعب ونحوس
وبنسمع بالسم الهارى
فن التنطيط فن التزييك
فن التلكيك
والمطرب شيك ..شكله يبكيك
لو شفته يشحم ويلحن
وبيحزق تطلع اغنى
وده شكل جديد للعالمية
فى زمان منحوس ..تتعب وتحوس
تتحزم وتغنى هبابى
وتدخش الجولة الفنية
م السابع للتاسع هابط
والناجح منكوا عشان لابط
جتكم خابط ..جبتولنا السكتة الفنية
فى زمان منحوس ..نتعب ونحوس
نتحجل ونغنى شبابى
ليست هناك تعليقات:
إرسال تعليق
اكتب تعليق