ع القهاوى والمصاطب
العيون فيهم كلام
هى فعلا ثورة قامت
وله كان حلم وكلام
مين يبع الصبر نصبر
لما يرجع البدر التمام
طب جموع الشعب نامت
وله بتجهز نظام
احنا شلنا كام حرامى
حد عارف باقى كام
الحساب دايما يلخبط
وكل حاجه مش مكانها
لخبطونا
اللى حامى كان حرامى
والحرامى كان امام
والامام خايف يحوشه
يبقى خارج ع النظام
والنظام كان له ديوله
يضربوا تعظيم سلام
والسلام كان غصب عنا
موت فى حب الامريكان
هى نفس الحسبة تانى
لسه فى شعب ونظام
شعب يدفع دم طاهر
والنظام ابطال كلام
واحنا شعب روحه واحدة
حتى نفس الدم واحد
اللى ماتوا ع الحدود
واللى ماتوا فى الميدان
واللى راحوا ف الف داهية
لما قالوا كان وكان
قالوا ست الحسن ضايعة
والنظام عايز نظام
هى فعلا ثورة قامت
وله كان حلم وكلام
حل تايه كان مكنش
وكان نظام
يا سلاااااااااااام
حكمة قالها واد عبيط
فى القهوة جارى
ع اللى حاصل واللى جارى
والنظام ابن النظام
نصه راح جوه المحاكم
ونصه لسه فينا حاكم
والديول ماسكة اللجام
يبقى معنى الكلام
الحكاية تمثلية
وله هو الشعب نام
لو صبرنا طب لامتى
لفين وكام
هى نفس الدايرة تانى
اللى حاكم كان حكيم
كل ما يهبر له هبرة
كان يقول شدوا الحزام
وكل لحظة كان بيعرف
زدنا كام ………
راح ما جبشى وجاب ما رحشى
المكان نفس المكان
هى حكمة من زماااااااااان
اللى خلف قال ما متشى
واللى مات راح فى الامان
يبقى ست الحسن تصبر
ع النظام وابن النظام
فى انتظار شاطر حسن
راح يدور ع الحصان
بس مش ينفع يجيبه
لما يلقى الشعب نام
ليست هناك تعليقات:
إرسال تعليق
اكتب تعليق