سألونى عيالى
ع العيد فى الغربة
ع العيد فى الغربة
قلتلهم عيد
بيعيد الماضى.. لكن مش عيد
العيد جه .وفى الغربة مجاش
بكل ظروف الضحكة ومضحكناش
سايبين الضحكة ليوم من عاش
اتارى الموت والغربة اخوات
والعيد فى الغربة مش اكتر من عيد
بيعيد فى الماضى واحنا بعيد
سالونى عيالى عن شكل العيد
وقالولى لا جيت ولا جبت العيد
قلتلهم جيت واديتكوا عيدية
وجبتولى هدية وفى الحلم مشيت
فطرت معاكم ودقت غداكم واتعشيت
عارفين يا عيال العيد فى الغربة
زى العيد ..لكن مش عيد
طب كيف هنحس بطعم العيد
واحنا فى توابيت
كيف هنحس بطعم العيد
وقلوبنا بعيد
وتقولى البنت العيد مش اكتر
من ضحكة فى وش ضناك
وكيف هنعيد وانت فى حضن الغربة
هناك
سنتين فى الغربة بنستناك
والعيد بيشوف البيت ويمر
مش قادر حتى يمر هناك
سنتين فى الغربة ان جبت فلوس
وان جبت كنوز مش اكتر
من دمعة بتحرق خد ضناك
سنتين من عمره بيستناك
وسكاته يقول امتى تخدنا
فى حضنك تانى
ونشوف العيد فرحان فى عنيك
ونمد ايدينا تخدنا ايديك
والعيد التايه بينا وبينك
نفتح له الباب ..
وتقول له قلوبنا تعالى يا قاسى
بكفاية دموع وكفاية عذاب
عارفين الغربة تجيب فى فلوس
وفلوسها تجيب من الدنيا دروس
الا الاحباب …
وان غبت عشانهم ولا عشانك
برضه عذاب
……………
خلتنى اقول بالصوت العالى
مش عايزك يا فلوس الغربة
رجعت احن لناس قبلينا منا وفينا
واكتر شى اخدوه من الغربة
مش اكتر من مترين دبلان
على تربة ………
ماتوا الموتة التانية قريب
وماتوا زمان سنوات الغربة
كل طريق الغربة هلاك
والموت والغربة اكيد اخوات
يا تموت فى الغربة
يالغربة تموت شى جواك
سنتين فى الغربة والعيد التايه
بينى وبين الاهل غريب
والبنت تقولى عيدنا مجاش
كان قصدها مش نفس الضحكة
فى عين الناس
وكانى الضحك
وكانى الضحك
لا كان ولا عاش
.صعب الاحساس
.صعب الاحساس
حتى عروستى اللى كانت
بتملى الدنيا ضحك وعياط
نامت على حجرى من سكات
رديت وقلت ان جيت هاجيبلك
الف عيد …..
وان مت هامشى من بعيد
يمكن يجيلك مرة عيد
فتقولى ليه صوتك حزين
حاسه بهمومه مش حنين
اقول لها .ايام بتلف وسنين بدور
ويجيكى العيد وابوكى بعيد
شى مش باليد ولا بالمواعيد
قدرى ومكتوب والعين وما توب
ان شافت الحلم تجرى عليه
وان شافت الجاه تحلم بعاليه
والواحد حتى ان كان سلطان
فى الغربة وحيد ينزف بعنيه
عايش ميت عايش فى ماضيه
ودا حالنا وحال العيد فى الغربة
ايام تحرت قلبى وتزرع فيه
الحزن يخضر …….
يطلع زى سنينى مقدر
العيد فى الغربة .اهو عيد
راجع وفى نفس المواعيد
لكن لسه الفرحة بعيد
ابعد من حلم فى علم الغيب
وسالت كتير هو انا قاسى
القلب يا عيد ولا انت عنيد
لا بتسمع اه ولا شكوى غريب
لا دويت الجرح
ولاسبت الجرح
ولاسبت الجرح
فى قلبى طيب
قدرى المكتوب استنى العيد
مصطفى الميرى
الله يسامحك يا أستاذ مصطفى
ردحذفجددت الأحزان
العيد في الغربة
مين قال ان اسمه عيد؟؟؟
العيد ده مش مجرد يوم ولا شوية لبس وهدوم
العيد إحساس وجَمعة ناس
إن غاب حبيب تلاقي حبيب
ووالله ممكن تلاقي الغريب
راح العيد وراحت أيامه
****
يوم ما كنا نشوف أحبابنا ونرمي نفسنا في أحضانهم
دلوقت الحبيب بعيد عنك هتلاقي مين تشتكيله همك؟
حتى نفسك قست عليك يوم ما تحن بردو مش هترضيك
****
العيد كان أيام زمان
يوم ما كان بعد الصلاة
تلاقي كل حبايبك حواليك
خالك وعمك وأخوك أبوك وامك واصحابك
دلوقت بقى قدامك حتة جهاز بتطلع كل كبتك فيه
قال ايه بتراسل وتشيت وتسلم على الأحباب
راح زمان الإحساس وكمان راحت الناس
حتى اليوم اللي بنستناه من عام لعام ضاع في الأوهام
لما غاب الصاحب والحبيب وحتى القريب
*************
كل عام وانت بخير وربنا يجمعنا بيكم والأهل في بلادنا اللي هي المفروض أولى بينا من بلاد الغربة اللي حتى فلوسها ما تداوي ولا تشفي
ايه الحلاوة دى يا استاذ رشدى دا انت مشروع شاعر كويس شد حيلك يا بطل وكل عام وانتم بخير واعتذر عن التاخير فى الرد ولم ادخل على الموقع من فترة تحياتى لك ولجميع الاهل والاصدقاء
ردحذف