لكل طاقة بترمى مور

لكل طاقة بترمى نور 

كاشفة الطريق 

ولكل ريق ميت عطش

ولكل حرف مات شهيد 

موصلش  بيته فى القصيد 

ولكل حرف هيتولد 

يكتمل بدر الحروف 

يطلع نشيد 

يطلع دوا  لكل عين 

صابها الرمد 

يطلع  ولد  .شعر 

ابن   حرف  و. واو  

وعطف  .وضاض  

ونسل 

لكل دول ليهم  سلام 

ولكل صياد فى بحر 

الكلام .

فارد ايديه يرمى الشبك 

ولكل حرف وايا حرف 

ساعتنا  يشتبك 

يطلع كلام .. يطلع حكم 

يكشف حقيقة 

ولكل فلاح  فى الغيطان 

يعمل الفدان  قصيدة 

ولكل حارس  فى المدان 

ولكل لنظرة عين بعيدة 

ولكل حارس  على البيبان 

يحرس الحرمة الوحيدة 

ولكل دارس   فى المدارس 

يرسم الكلمة الجديدة 

لكل دول  بهدى  القصيدة 

سواقة بنات

سواقة بنات

........... ...

خلت المرور يعانى

والقضية بجد ضاعت

ما بين سلوى وامانى

نص المصيبة فى المعاكسة

ونصها فى سمع الاغانى

وبعضها  بنظرة  تهانى

 فيه حوادث بالتعاون

هى بس ترمى ضحكة

واللى يصدم حد تانى

مرايات  الجنب  عادى

حاجه طبعا مش بايديها

والمرايا الوسطنية

لو حابة تعرف لون عنيها

ولون عنيها  زى حالة

الطقس عندك

كل مرة  شكل تانى

بس اقولك الحقيقة

كلنا فى الاصل واحد

ع الاصل  دور

اللى بنى مصر  كان

فى الاصل  حلوانى

واللى علمها  السواقة

والذواقة  كانت  امانى

واحنا بنحب التاريخ

ويفضل المرور  يعانى

اليل فى بلدنا

اليل ف بلدنا 

…………….. 

اليل فى بلدنا 

ليل حقيقى طعم تانى

ليل بياخدك  للامل

وابتسامة حلم

وود صافى مش انانى

ولما تمشى جنب صاحبك

وله هو عليك يفوت

تلمح الود فى عيونه

وتنعشك ريحة البيوت

البلد دى  حاجه حيه

هى حالة واستحالة

فى يوم تموت

ليل بلدنا صاحى دايما

من بعيد تقدر تشوفه

زى نجم وزى مدنه

يشبه الناس اللى فيه

يرفض الخوف والسكوت

طعم تانى ليل بلدنا

والشقاوة اللى فى ولادنا

وكلنا نشبه لبعض

زى ما يكون اتفقنا

نبقى واحد 

ورب واحد خلا

بينا معاد  ووعد

احنا مش اجناس غريبة

بس حالة …..

احنا ع الخريطةحته

وكل واحد منا فلته

يبقى قاسى  ويبقى راسى

ويبقى طيب وابن نكته

والسكوت ما نعرفوش

فى الفرح بنقول ونضحك

واحنا برضه نقول فى موت

والامل حبة تقاوى  نحفظه

فى كل البيوت

وناس بلدنا يعرفوه

وبايديهم يزرعوه

لما يجى الحزن فيها

يطردوه

والعجوز اللى يدوبك يسندوه

بتلقيه فرحان بيضحك

وكانه شاب وحيلةابوه

وتلقيه متوضى دايما

والملايكة يعرفوه

باختصار ليل بلدنا

يشبه الناس اللى فيه

ليل بيفرش لك محبه

والامل هو الونس

لما يدخل ليل بلدنا

وتلاقى عم الشيخ عمر

رش وكنس

ويبتدى فى كان وكان

كل الاحبه يسمعوه

ويرتبوا ورق الزمان

وتبدا الهموم تضيع

فى جلسة تانية  عبقرية

لعبسميع

ويلملموا كل الخيوط

يتكلموا ويكلموا

جهات بلدنا الاربعه

واللى حاضر واللى غايب

واللى كان ضد ومع

وناس بسيطة تحسهم

عايشين بخفة دمهم

والفقير زى الغنى

الشيخ حسن

وعمى ناجى وعمى ضاحى

وحكمة الشيخ عبغنى

باختصار هى حالة

 واستحالة فى يوم  تموت
لحظة امل 

والمحبه والونس
 جوا البيوت

وفى ليل بلدنا 

ز

مكتوب

مكتوب 

يفضل شايل

حلمه فى ضهره

ويمشى .طول

السكة يكح

وكل شوية 

يعد صوابعه 

بنفس الحيرة

يجمع يطرح

حلم  وحلم 

ناقص ضحكة 

والف سؤال

فى دماغه يلح 

فااااصل .

حاصل ضرب 

الحلم .فى عمره 

عمره.. ما طلع 

نااااااااتج صح

يا ولد عمى

#يا ولد  عمى  

"يا ولد عمى    

خليك فى ريحى 

لا تسيبنى تايه 

ما بينّ كدبى 

وبين صريحى 

بنظرى لسه

بشوف هبابه

لكن بشم ريح 

الديابه

قتلونى حى

وانا لسه عايش 

شايف ضريحى 

بستنى بكرة

الم جآرحى

وتهب ريحى 

ياولد عمى 

كفك فى كفى 

الحق وحده 

مبقاش يكفى 

دآ سابنى تايه 

ما بينّ كدبى 

وبين صريحى"

يا ولد عمى 

خليك فى ريحى 

دى الدنيا غابة 

والشوف هبابة 

والصدر ضيق 

من غير  رحابه 

ولا عدش نوحى 

يلضم  جروحى

و الدمع فاضح 

فى السر  بوحى

يا ولد  عمى 

شمر  وسمى 

همك ف همى 

خضر  وطارح 

خليك ف ريحى

لا تسيبنى تايه 

ما بين  كدبى 

و بين صريحى

قلب العاشق

قلب العاقل 

قلب العاقل لما يحن 

ينسى جروحه .ينسى 

الظن .

لحظة ضعفى  فى لحظة 

خوفك 

لما يموت  الحلم العايش 

لما الوعد فى صدرى يئن

قلت .يا ويلى..

.وقلت يا ويلك ..

لما بيدخل بينا الظن 

والاحلام تهرب من ايدك

قلت .إن عشت هجبلك حلم 

قلتى. إن عشت العش نلم 

وقلنا الحلم الصابر يكبر 

بينى وبينك مليون وعد 

ومليون  إن 

ميكفيش .الكف دموعك 

عارفة .وعارف

  قلب العاشق لما يحن 

ينسى جروحه ..

وحلم العاجز دايما .إن

حلم

من قهر يومى نمت 

والحلم كان الحل 

كأنى لسه فى اتناشر 

وشهر البشاير هل 

ولسه يدوب هتربع 

فى باقى الحلم 

القى  مواكب الشهدا

مطيبين بالمسك 

متوشحين  بالفل 

ولسه هبدا الكلام 

قالوا السلام للكل 

وسلام  ع اللى قال

الحل هو الحل 

سلام على الصابر 

وعمره ما  مل 

وسلام على القابض 

على جمر ثورتنا 

مهما الميزان  اختل 

وسلام على   .ميدان  

كان الونس  والضل 

وبالمرة قول  للكدابين 

الافاقين .

الثورة   مش بس ذكرى 

تذكروها ف احتفال

وتنكروها  فى المحافل

الثورة فكرة  بنت 

شعب وبنت  فكرة 

حاولت  ارد  كان 

عدا موكب الشهدا  

وهما لسه بيهتفوا 

عيش  .حر  ......

وقمت  صحيت 

سلام على اللى حلموا 

ولسه مصحيوش 

م الحلم 

#مصطفى -الميرى

اغرب كلام

تسمع كتير  اغرب كلام

من ناس تقول خلاص سيبوه

قال ايه بحجة  الاحترام  

طب يبقى فين الاحترام  

لما  الكبير خلى المدام    

بدون سبب تمسك  نظام    

ويبان عليه  التكتكة  والاحتشام

ولسه داء العنيد  فيه      

مستغربين                

بتوع يناير  يسالوه          

متر الوطن   بعتوه  بكام      

وازاى وليه ان الفقير

و ابن الفقير    

يبات  جعان   وازاى  ينام      

وازاى وطن يرخص يهان      

عشان المدام  وابن المدام        

وازاى حقوقه يخدها ريح      

ومالوهشى حق الاعتصام      

كان  فين ضميرك يا بطل    

ازاى  تحس بالامان    

وازاى تنام……….  

ويعنى ايه ترضى  المدام      

وترمى الحلال  فوق الحرام    

وانت فوق جبل غرور    

قايل امان  الشعب  نام    

مع انى فاتك شئ  اكيد      

العدل  مش انشئ  وكلام    

تلاتين سنة بتخمنا      

عايش   تمص  فى دمنا    

وكلاب  حراسة  تلمنا      

وانت بايديك   بتسمنا    

تلاتين سنة   كنت انت    

اكبر  همنا        

سبناك  تتوب وتقول حرام  

يا ابن ال ……………….  

بلاش  حرام      

لسه فينا   الاحترام    

ولسه جوانا  الوطن    

عمر الوطن ما كان  نظام

الوطن لحظة ادان  

الوطن  قلب الميدان  

وعيال تحس بالامان  

الوطن  مش بس حكم

وصولجان …………

  لو مرة واحدة تفهموا    

يعيش  نظام      

ويموت  نظام    

والوطن  هو الامام  

لو  يفهموا معنى الكلام

يقولوا قال احنا  بشر

انا  داخلى  ايه  بضعف

النفوس      

قالوا الزمان عايز  كتير

وانا دخلى ايه بحب  

الفلوس      

بيقولوا  قال مضحوك عليه

وانا دخلى ايه بشلة    تيوس

ميعرفوش كلمة حرام  

والعدل  عايز ترجمة

والاحترام      

والترجمة  عند   المدام

قال الرآوى

        البشر  الوان

هتلاقى ضآلة و تلاقى ضال 

    الرآوى قال:

الراقصين  الطبالين 

على كل ناحية وكل حال 

الطماعين  الغرقانين 

فى الكدب لجل يكون وصال

الافاقين الكدابيين الجاريين

ورا الكراسى  والمناصب 

من غير عمل من غير نضال 

قال الراوى .. 

عوج البشر على كل حال

زيه زى ديل الكلب 

وعشان تحاول تعدله 

هتلاقيه صعب ومحال

لحظة ودااع

سلميلى

كل لحظة سلميلى ع المكان

سلميلى ع الحيطان 

والاحبة.والنوافذ والبيبان

وكل لحظة خلى بالك 

ع المكان 

واملى كفك .بالحكاية 

واملى عينك باللى كان 

كل لحظة .سلميلى 

ع الولاد 

وامسحى على قلب امى 

وسلميلى ع الجيران 

وبعد لحظة .حاولى تنسى

لحظة بتهز المكان ..

واغفرلى .

وانت واقفة تودعينى 

والدموع بتبوح ف عينك 

والدموع واقفين  فى عينى

لجل ما اعمل نفسى راجل 

قلبه مييت .

قلبه ساقط فى المشاعر 

والعلاقة بالمكان .

هو نفس الوهم عندى 

ورغم  عندى .

كنت باخسر  الرهان .

طب ضحكت يومها .

شفتى ؟!!

وحاولت اخلى الضحكة 

اواضح .

علشان احس انك سامحتى 

الدموع دايما  بتفضح .

كنت عامل نفسى سارح 

وعنيا بتلف المكان 

هى كانت لحظة صعبة 

احذفيها من الزمان 

واضحكى ضحكة امل .

طول ما لسه القلب حى .

خلى روحى فى المكان 

سلميلى ع اللى رايح 

واللى جاى .

واللى يسال عنى قولى .

قولى .مييت بس حى 

اصل طعم الغربة نفسه

زيه زى .

الموت واكتر 

واللى يقدر فينا ينسى 

يبقى اشطر ..

يبقى رغم البعد حى ..

لحظة وداع ..

ارسميها .اكتبيها .

وان قدرتى  احذفيها 

لحظة بتهز المشاعر 

والبكا بيكون مشاع 

ع المودع .واللى وداع.

عين بتبكى ع اللى رايح 

وعين بتبكى ع اللى جاى.

سكة سفر ...دمعة سفر ..

شنطة سفر..مش صحيح 

كانى شايل قبرى فى ايدى.

دقت  طعم الموت وحى ...

عارفة يومها ؟!!!!!

ولا اقولك .عايز انسى 

وانت تنسى ..

وطول ما لسه فى عمرى 

باقى .يبقى جاى .

يبقى جاى

بسأل ليه

قديم الحلم من فترة 

ولسه عجين 

ودمعك يسبق الضحكة 

وكآنه هجين 

وانا التايه .

بين اليوم  وبين بكرة 

يدوب حدوته او ذكرى

وكلام باقى معدش يسند 

المايل.  

معدش يفسر  الاحلام  

ويطفى الحلم جوانا 

نقول بكرة.

تموت فكرة. تعيش فكرة 

نقول بكرة .

عجين الحلم يتشكل 

واقول حلمى .قصادحلمك

لا حلمك نافع خبيز للعيش 

ولا حلمى قاسم له يعيش

بس صابر ..

وتلاقينى  قلت بكرة 

بس خايف 

بكرة يحبى يروح بعيد 

وتلاقينى رجعت سخرة 

وفى زمن  كان للعبيد 

ايوه صابر 

طب قوللى لامتى صبرى 

وانتى عمرى . .عايز اعيشك

بس اكون حر وطليق 

مش رقم فى طابور لعيشك

او جثة هامدة ع الطريق 

المشاعر تايها منى. وتايها منك

ولما  اقرب تبعدينى ..

وتحضنينى  لما برجع لك 

غريق ...

قديم الحلم من فترة 

ولسه  عجين ..

اقولك  ايه  ...

يا بنت ....ال ايه 

خلى الكلام بكرة

قال الراوى

يا ولاد  قديم الحلم 

بالعدل للعايشين

يا مغمضين القلب 

يا نهابيين بالعين 

القسمة جنه ونار

وانتوا مش خايفين 

وكآنكم أبطال .

مش  مخلوقين من طين 

العين تشوف الظلم 

وتوه عن الظالمين

قال الراوى ..

لو الفقير اشتكى

واحتار  هيشكى لمين 

هيحل صر  البكا 

ويبقى الكلام بالعين 

ملعون ابوه الخوف 

وطوبى للمساكيين

كلها ايام

لسه  فى  امل

كلها  ايام  

كلها ايام  وهيخلص همك

وتفوقى

وهنكتب اسمك من الاول

وهنرجع نضحك لسنينك

وهيرجع ضحكك وتروقى

وهتطلع شمسك من الاول

وايامك تطلع فى شروقى

واتنسم نسمة حرية

واتمسك بيكى وبحقوقى

وهيرجع حلمك من تانى

اتلجم لما يغيب حلمك

وانا قلبى البايت يحلم لك

والنبض الساكن فى عروقى

اتغير شكلى وتكوينى

لما انتى بداتى من الاول

وبدات اطلعلك عن طوقى

وارسم لك بكرة على كفوفى

وانا شايفك اكبر من شوفى

واقرب من  دمى فى عروقى

انا صابر زيك    مش خايف

وهيرجع ضحكك وتروقى

قال الراوى

تخاريف  

..قال الراوى 

الحكاية  

م البداية  للنهاية 

حلم حى .وحلم وردى 

وخطوة  جنب الخطوتين 

خطوة واخدة  الحلم ماشية 

وخطوة ماشية تقول لفين 

نام  الراوى .

قام  الراوى .

قال الراوى .

كل احلامك كفاية 

وكل مسعى فرض 

عين

#مصطفى -الميرى 

خلى الامل فى الله

خلى الامل فى الله 

وإحلم  بشئ تلقاه 

هو اللى خلق الدوا

من قبل خلق الداء 

بدل حروف صرختك 

خلى الكلام مناجاه 

تقدر تقول ياارب 

بدل الانين والآه 

ايوب .لما صبر 

كشف الإله بلواه 

ويونس فى بطن الحوت 

علمه .المناجاه

وموسى يسافر 

بحر لحضن كان واياه

ويوسف يلف الارض 

لما الإله  علاه 

يعقوب لربه اشتكى 

سمع الإله شكواه 

يا مبتلى  ....

تطلع ايه بلوتك 

عند القدير .الله 

عمى الحاوى

قرب .جرب 

شوف الساحر 

شوف الحاوى 

اللى مخبى 

فى جيبه بلاوى

يضرب .سوريا 

يزغزغ .كوريا 

ولسه الحاوى 

مخبى بلاوى 

جرب  شوف 

لما.هيلعب 

ع المكشوف 

فتح  .عينك 

غمض عينك 

كله بإذن الله 

هيدينك 

لونك .شكلك 

اسمك .دينك 

قرب .جرب 

شوف الحاوى 

لاحظ    ..إيده 

تدخل  جيبه 

يحط .براقش 

تطلع ..داعش 

علشان يجى 

ويضرب .داعش 

تبقى ..براقش 

فتح ....لاحظ 

إيده ..فى جيبه 

ويقتل .يدبح 

يمنع ..يسمح 

ويبان واقف إيده

فى جيبه 

وعمره ما ينسى 

ويفضح ..عيبه 

قرب ..جرب 

إهتف .سقف 

اهتف ..اهتف 

شوف اﻷعيبه 

وارجع فكر 

وﻷ نسيتوه !

يشرب دم 

ويعمل فيتوه 

وفجاة .يقول 

للكل شفيتوه 

وعشان .حاوى 

وعارف يلعب 

أدى .الخية 

وأدى الحية 

علشان ناوى 

يغمض عينك 

اوعى  .تشوف 

العبة ..الجاية 

لكن .قرب منه 

وجرب 

شوف الساحر .

شوف ..الحاوى 

لعبه .جميل 

ويحب المة

لكن .جوا حدود 

اﻷمة .

بتقول ..مين !

قال:الحاوى 

طب  لو شاطر 

حدك .فين 

هااااه وبعدين 

بعد شوية
 عمى الحاوى 

هيعقد .خية 

تدخل .جيبه 

تطلع  ..حيه 

قول .الحاوى 

قولى يا شاطر 

تلدغ  مين ...

هيكون ..ميين ؟!!

تلدغ  .أمة .لدغت

مرة .. من دوكهما

علشان .هما 

ولا يوم حسوا 

بقيمة  اللمة 

فاكريين لما 

عملوا القمة 

وعملوا وراها

خمسين  قمة  

من غير ذمة 

علشان خافوا 

من دوكهما !!!

انا  عارفهم  

وانت  عارفهم  

بس الحاوى .عمره 

ما سمى 

علشان  لما  

هيلعب  تااانى 

تقعد طول العمر  

تدور..

مين المجنى عليه  

والجانى 

ولما الحاوى 

يخش عراقنا 

يحط البيضة  

ويكتب  سوريا 

فى جملة  مفيدة 

قرب .وأسأل  عمى 

الحاوى 

قوله .يا ساحر 

قوله .يا حاوى 

طب والبيضة 

هتطلع  ..فين 

قال .الحاوى .

فى فلسطين 

علشان واخد الشوف 

من عينك  .الله يعنيك 

بص  شمالك ...

راح يديلك ضرب يمين

وانت بتسمع  آه  ورا

آه

منتاش  عارف .مين 

ولا فين ...

ولسه الحاوى 

مخبى ..بلاوى  

فتح عينك  شوف 

لو غاوى 

خرج الحاوى  معبى 

حكاووووى .ويدوم 

العز على السامعين

معرفش ليه

معرفش ليه

معرفش. ليه شايفك كده

على كل غصن تغردى

وتحطى على شجر الخريف

باسطة الجناح وتغردى

بدون رتوش ولاحتى زيف

من غير خيوط الاحتمال

من غير ما حتى تفرضى

على كل غصن تغردى

معرفش ليه. شايفك كده

مع كل لحن بتعزفى

من غير ما حتى تعرفى

اخر طريق الغنوة فين

وعشان كده لو عبقرى

كنت ارسمك

 زى اشجار الزيتون

كنت اعزفك على كل وتر

وكل لون

وفى وسط كل المستحيل

يطلع كل شى ممكن

لكن بجد اقولهالك

لا بتحامل ولا بتجامل

فى قول كلمة

ولا بكتبها من خوفى

لكن شوفى

بيقرا بجد ويعبر

منيش فارس ولا راكب

حصان  الشعر   بتمنظر

ولا بحكم على الانسان

بحكم الطلعة والمنظر

لكن صريح واقول رايى

ولو صادم وضد الريح

ويتساوى البشر عندى

فى عزالشدة والتباريح

لكن يفضل عزيز جدا

انسان بيعرف الانسان

امين جدا ..

وفى كل شدة يبان

وزيه زى الديك

صريح جدا ويتخاوا

فى كل ادان

وينفض غبار الليل

ويفرش ضى.. صبور جدا

ويستنى بكرة الجاى

عشان يعرف كمان انسان

#مصطفى -الميرى

ضحكة فى دمعة

ضحكة  فى دمعة

اضحك ودموع مليين  عينى

لقيتنى باضحك من قلبى

على قولى!

  فى مرة وحشتينى

مع انك  اقرب من قلبى

ومن دمى الجارى فى  شريينى

وساعات  انا بخجل من نفسى

لو  قلت  فى مرة  وحشتينى

واستغرب  جدا  على نفسى

اقولها ازاى  وانتى فى عينى

انا  دائما صادق مع نفسى

وحياة  العمر  اللى اتلخبط

وسنينك دخلت  فى سنينى

وحياة  الكون لما  يضيق بى

واتنفس لما  تضمينى

وحياة الغربة اللى خدتنى 

ونسيت   شكلى وتكوينى

احلف لك صادق مع قلبى

مش اقولك  مرة وحشتينى

طب اقولها  ازاى 

وانتى فى عينى 

لو بايدى هوقف ايامنا 

واقولك انتى استنينى

انا  لسه بحارب فى الغربة

وكل الاحلام وقفت  عندى

انا طالب بس تسمحينى 

وانا اسامح الغربة

اللى خدتنى 

علشان  خلتنا نكون اقرب

وعشان  سكنتك  فى عيونى

انا كائن  كائن بوجودك

واتمنى طول عمرى تكونى

اجمل ساكن  فى عيونى

انا والحلم

انا . والحلم 

وسيف بتار 

لكن مقسوم 

لا جاب التار 

ولا بسند عليه

ضهرى ،اقوم 

يروح  النوم 

ولسه الحلم

  بيناور

وكان الصبح 

بيفتح .ويدى 

اﻷمر ...

قوم ادن 

وعدك .لوحدك 

انت والسما.

والضى ..

قوم .كبر 

وامسك خيوط

الصبح..

خلى الضيا يكبر 

واضرب  سواد 

الليل ...

مع انه متكبر 

نص البراح . كلمة 

انطق ....قوم 

والعن  ابوه الحلم 

لو فى النوم 

طول عمره ..

ما ينطق ولا يكبر

ولا خدت منه رهان

وكأنه مستكبر،

ابلع. مر الحقيقة 

مهما  يزيد  همك

ومهما يزيد الضيق 

شد البراح . يمك 

من غير ما يجى 

اﻷمر ..

ولا حتى تستاذن 

الحلم .حلم فرحته

بتغييب ....

مقبول سهم 

الحقيقة

لو حتى بيحزن 

قالوا فى الامثال

الاصيل ..

يفضل قديم الاصل 

فى الاصل له سوقه 

ويفضل عديم الاصل 

عديم مهما تزيد نوقه 

يمشى الاصيل 

فى الاصل 

ياخد الطريق شوقه 

ويمشى عديم الاصل 

فى الاصل ..

على ذوقه 

على راى المثل .

زى حمير العنب 

تشيله  ما تدوقه. !!!

الادب ..

عاشر صاحب الادب 

والذوق .

واصبر على مر الزمن 

يمكن  بكرة  تروق  

وانصح وعلم الصاحب 

ياخد النصيحة يفوق 

وبلاش تكون  امعة 

دول قالوا فى الامثال :

زى الرهريط 

لا  يبنى . ولا يسد خروق

قلبى عندك

عينى اول شئ يودع

مهما  كان حجم الرهان

وقلبى  اخر شئ  يسافر

يمشى ويسيب  المكان

واللى باقى  ع الوداع

يبقى  كلمة ع اللسان

والى كان فى القلب  كان

خلى بالك  قلبى عندك

لسه داير  فى المكان

والايدين مليانة  ذكرى

والعيون فاكرة اللى كان

خفت  تنسى  ...

قلت اقولك  تبقى فاكر

قلبى اخر شئ يسافر

زى الصلاة  بعد الادان

الا الدستور

الا الدستور                       

بين الراى،  وبين الرؤية

فرق كبير وبعيد 

ابعد من هنا لهناك 

هنا فى شعب

وهناك  شياطين الانس

هتستناك

نفس الكهنة بتوب ثوار

ومحدش هيشيل الشيلة

سواك

هتشيل من غير اعذار

ولا حتى سابق انذار

وهناك هتقابل شعب

غير الشعب

وهيبقى اسهل خياراتك

صعب

يوم ما هتؤمن انت بذاتك

ساعتها هتكفر بالشعب

والكافر هيخش النار

نار الشعب         

الحسبة مهيياش كهنة

وثوار

الحسبة  ساعة الجد

قرار

هتلاقى هناك  نفس

الكهنة ونفس الشياطين

هما البلوى .وهما القادرين

ع الرقص عرايا  لهدم القيمة

وصنع الفراعين 

وهما القادرين  ع الكدب

وتزيين  الوش لاله  من طين

حاسب من خطوة تاخدنا هناك

فى الرايح   فكرة 

وفى الراجعة  هلاك 

يوم ما تقرب م الدستور

بايديك  رايح تفتح طاقة

نااار  !..مش نوور 

سيب الكهنة واحسب

حساباتك  صح

انت الدافع  تمن  الخطوة

يما  تخييب،  ويما  تصح 

حاسب من نفس الشلة

نفس الملاعين 

نفس العلة  

هيحصروك باسوار الكدب

وهيبنوا بينا وبينك

سور ..ولا سور الصين 

ولذلك انا  من حقى

اقولهالك

خليك للشعب  واحنا

معاك

وحاسب من خطوة تاخدنا

هناك

شياطين الانس هتستنانا

وهتستناك

قول للشلة ايها  تغور

الا الدوران  حوالين  الذات

الا الدستور

#مصطفى -الميرى

        قاوم

....

خلى ضميرك هو الرابح

حلمك بكرة يشوف النور

لما تصالح نور الصبح

بكرة تشوف الحلم البور

طارح نور وسنابل قمح

حارب فيك الخوف من بكرة

حتى لو مكسور الرمح

اكبر حلم  يببدا  فكرة

تقدر

       قوم

             قاوم

ارفض كل دواعى القبح

اللى يفوز بالحرب صبور

مش هتسيب من عمرك يوم

بيك من غيرك  طالع صبح

تقدر.

       قاوم  .

            قووووووم

ارفض كل دواعى  القبح  

سطرين دموع

فوازير

فوازير وحاجات

 تنفع الغاز

طراطير للعيد

.موعيد للناس

وفقير مد ايديه

للشمس انداس

فرش الحلم

ونام واتغطى

وخله الدنيا

فى رجله مداس

وشاف فى الحلم

الدنيا التانية

اللى مشفهاش

ماشى يوزع  خير

لاصحابه

ويقسم ضحكة

 مضحكهاش

دنيته قد ما تاخد

منه بتدى

قاتل همه بمليون فاس

فرش الحلم واتغطى

حس الدنيا بميت

احساس

فى لحظة حزن

فى لحظة حزن مش اكتر 

اعاتبك  مرة وميت مرة 

واقولك ليه غريب فيكى 

مشفتش قرب لو مرة 

واقولك ليه مانيش ليكى

وليه تانى مش حرة 

واقول كارهك 

فى لحظة حزن مش اكتر

اغيب عنك واغيب فيكى 

ونتقابل كما الاغراب 

فى ميت سكة 

واشوف الحزن فى عيونك

تشوفى الشكوى فى عيونى

اقول خلاص  خلاص هنتى

واقول اكتر .

فى لحظة حزن مش اكتر 

وحلمى وحلمك فى الصدور 

والغيب 

عشان عايزك حرة زى زمان 

وعايزانى امير بحصان 

وشاب الحلم شاب شعرى

وغاب النسل من ضهرى 

وبمسح كل احزانى

  فى توب طهرى 

واعاتبك واقول من قلبى

مش عايزك 

واقول كارهك يمكن 

بس من قهرى 

فى لحظة حزن مش اكتر 

وحيرانى  غباء حضنك 

احط البسمة فى شفايفك

تحطى الدمعة فى عيونى

وشلة  حقد   بتخونك

ولفاهم بتوب طهرك 

تعاتبينى 

وايه  يعنى اقول كارهك

فى لحظة حزن مش اكتر 

اقولك ايه  

احارب فيكى اعدائى 

واحارب ليكى اعدائك 

صحيح الياس كان دائى 

لكين الصمت كان دائك 

وحلمى يتوه فى اوجاعك 

واقول روحى  وسيبنى

فى لحظة حزن مش اكتر 

حلم الشبع

ارض البلد حنت

كيف ما يحن صدرالامومة

وصوت العيال فى البكا

تنحت .تنحت ضوافرهم

فى جلد الجوع

تغسل عينهم  دمعة

تغزل فى حلم الشبع

تصرخ .تصرخ لاخر السمع

تسكت ..تسكت فى لحظة

ورع

يرجع بكاهم شجن

يحضن جسدهم وهن

تسمع بكاهم حرة

تلعن جفاف البز

تلعن قتيل الحس

تصرخ .تصرخ

حلم الشبع  كدبة

حلم البشر ...

يرسم خطاهم  قدر

م الفرحة   لكربة

تغزل ايديهم

حلم  ايد القدر غالبة

تجمع شتات البدن

تربط خيوط الكفن

تمنح جسدهم سكن

يرجع لصوتهم  صدى

حلم  الشبع  كدبة

حلم الشبع  كدبة

من بيتنا  لتربة

لسه مخلصتش الحدوتة

لو دخل الريح الغادر 

عندك 

ايه  ياخد الريح 

الحظ مخصمك ومعاندك 

ايه ..ياخد الريح 

يكتب من دمك  حدوتة 

يزرع من همك  كام توتة 

يحضنها الريح غصبن  عنك 

ويفجر قلب الحدوتة 

وسؤال العمر  بيتكرر

الباقى فى عمرك كام 

موته 

لو دخل الريح يسال عنهم 

والحلم الازلى البنوتة 

مش يعدل طولك لو مايل 

ولا يسند ضهرك لو شايل 

وهتبعت من الهم رسايل 

والكلمة الواقفة فى حلق 

الزور 

كان نفسك مرة تطلعها 

كان نفسك تبقى فى حجم 

القول ..وتقول 

والخوف  مش انك تنطقها 

الخوف لو مين راح يسمعها 

يمسك احلامك يدبحها 

وهترجع نفس الحدوتة 

عمرك من عمر التوتة 

يقلعها الريح غصبن عنك 

وتهاجر تهرب من  حلمك 

ترجع انسان 

من غير انسان 

وتضم فى ضحنك وتهدهد

الحلم الازلى  البنوتة

الحلم العاجز عن شيلك 

الحلم الصابح على خيرك 

الزارع ضعفه فى شريينك  

وسؤال يرجع  تانى 

لو دخل الريح  

ايه ياخد الريح 

مش باقى فى عمرك 

غير موته 

لو موتك قبل الحدوتة 

راح تسند ضهرك على 

توتة 

مزروع فى فلب الخوف 

منك 

يقلعها الريح غصبن عنك 

وساعتها ترجع تتمنى 

لو يرجع عمرك من تانى 

وتصد الريح قبل ما يدخل 

وتوزع جيمك  تتحدى 

لو دخل الريح  من ميت 

مدخل ...

وتوزع دمك  ولا تبخل 

يمكن .... 

وساعتها لا تسند على 

غيرك 

ولا يصبح غيرك على 

خيرك 

مش  باقى فى عمرك 

غير موته 

ولسه مخلصتش الحدوتة 

12/8/2006

..

على مصطبتنا

على مصطبتنا من زمان 

جدى كان قاعد بيحكى 

يحكى للناس الغلابة 

ع الديابة 

لما تنزل غيطنا بدرى 

وكل عود طالع تهده 

لجل تكشف ضهر جدى 

او تهده 

ينصلب .يندب فى ارضه 

يتقهر من هتك عرضه 

والديابة لجل تكشف ضهر 

جدى 

كان عنيها ع العيدان 

لجل يسقط تحت جوعه 

وتضرب المربوط فى راسه

تهرب الفكرة اللى كانت 

من زمان 

يومها قالوا  تحبل الارض 

الشرقى 

بميه جايه من  السودان 

نعجن اللقمة بعرقنا  

ينشف  الضهر اللى رحرح

جوعنا احسن الف مرة 

من رغيف سيب ركبنا 

ابو سوس وقمح من الجيران 

يعنى عودهم ابن تسعة ؟

واحنا عودنا اخرس جبان 

قالها  جدى ..

بس كان بعد العشا قبل 

العشاء

وقبل ما يكمل حكايته 

للغلابة  ع الديابة 

الله  اكبر .سمع الادان 

ختم الصلاة ورجع كافى 

خيره 

شره 

نام  

لجل يصحى الصبح بدرى 

يملى  عينه  بالغيطان 

يمكن العود اللى خايف 

ساعتها يشعر بالامان 

والديابة  بنابها الازرق 

تعرف  انى  

جدى صاحى  من زمان  

فى القطار

اللى نايم .واللى قايم
 .واللى هايم 

انفاس كتير ماليه
 الكباين

والقطر زى الزمن 

ماشى يبلع فى المدن 

وكانه عمره ما داق شبع 

ولا اتوجع 

ولا حس  معنى للسفر 

ساعة حبيب ما يسيب 

حبيب 

ياخد فى وشه كل شئ 

يطوى الشريط زى الحبال 

وصبره فاق صبر الجمال 

مخلوق  غريب ياخد حبيب 

ويجيب  حبيب 

لكنه فى الاحساس بليد 

يمكن عشان اسى وعنيد 

او عشان قلبه الحديد 

ما داق شبع ولا اتوجع 

ولا حس معنى للسفر 

لا فى مرة امن بالحياة 

ولا حتى بالحياة  كفر 

اديتوه كل شئ حروف 

مكتبش غير كلمة سفر 

عشان قطر .

الدنيا عنده لحظتين 

لحظة لقا  ولحظة سفر 

صحيح  قطر .وابن الطريق

مكتوب علينا  ننتظر