يا سلام لو كان بايدى
كنت اضرب الحرمان
رصاصة
لاجل مالفقير يعيش
واملى وش الناس
بشاشة
وضحكة صافية ما تنتهيش
لو بايدى
اعمل الكفين سفينة
واعبر اللحظة الحزينة
واوصل النقطة الحصينة
واقتل الداء اللى فينا
يعنى تانى منططيشن
لو بايدى
احضن البحر اللى حاضن
قلبه الف وميت غريق
وارسم الاحلام لبكرة
يركب الحلم الطريق
وابقى قد القول واقولك
مين عدوك مين صديقك
لو بايدىل
كنت اخلى الناس حبايب
اللى جنبك واللى غايب
لو بايدى
كنت هاضرب كل فاسد
كنت اموت كل حاسد
كنت هارمى الشوف وراصد
كل خطوة ف الطريق
كنت اقول وبجد قاصد
لو بايدى
مش هاغنى نشيد بلادى
قبل ما اطيب قلبهم
امهات بتقول ولادى
خدهم البحر المعادى
مين يحاكم مين يقاضى
واللى ساكت يبقى راضى
يبلع البحر الفقير
لو بايدى
بس ايدى قد ايدك
من زمان بنقول ونسمع
ياسلام لو كان يفيدك
ازرع القمح اللى يستر
يومها بس تفك قيدك
مين يكون فى الخلق سيدك
يا سلام لو كان بايدى
كنت مش هاحلم لوحدى
كنت اقولك ع كانت
واللى كان السر فيه
انت مش مخلوق مطاطى
انت مش مولود سفيه
حتى لو مقتول بتنزف
قوم وقاوم
يعنى مش ينفع تساوم
اصل روحك تسوى ايه
وانت لو منتاش معانا
تبقى ناوىتركب البحر
اللى غاوى يبلع
الناس اللى فيه
ليست هناك تعليقات:
إرسال تعليق
اكتب تعليق