حبة ذكريات
اللى فات من عمرى فعلا
عمر وحده مش مجرد ذكريات
كل ساعة فيها عالم
والحقيقة تبقى اقرب للخيال
وكل يوم كان فيه حاجات
الحكاية بجد اكبر
مش حكاية عمر فات
مش قضية حلم شايله
جوا قلبى وفى عيونى
ولا الف حلم مات
خط واحد
يجمع الموت والحياة
يتولد جوانا حاجه
زيها بتموت حاجات
زى صاحبى ونص عمرى
كان شريك الذكريات
كان شريكى فى كل حاجه
لما نحزن نص دمعة من عيونى
ونص دمعة من عيونه
وكنا قسمين السكات
وعمرى ما انسى لحظة قاسية
لما طلعت منى ضحكة
هى لحظة ضعف
فعلا غصب عنى
هى يوم ما صاحبى مات
لما لم الموت حاجات
وقتها وقفت حاير قلت
روح يا نص عمرى
روح وسيب لى الذكريات
يومها ضعت جوا منى
وسيبت نفسى تقول لنفسى
هو مين فينا اللى مات ؟
هو انا اللى مت فعلا
ولا انا اللى شفته مات
ودار فى بالى لما كنت سالته
مرة
هى ليه بتموت حاجات ؟
افتكرت يومها قالى اقسى موت
فى الدنيا هو لو تموت الذكريات
لسه فاكر للنهاردة وكل مرة افتح
الالبوم واشوفه مش مجرد حد جنبى
ولا فكرة عمر عدة ولا صورة من سكات
كل مرة اقول لنفسى هونفس التتر ماشى
وادى مشهد البداية من شريط الذكريات
والشريط بيلف تانى والمشاهد
هيه هيه شكلها شكل اللى فات
ولامانى برضه هى نفس الامنيات
والمشاهد ع التوالى مشهد الافراح
يعدى وبعده مشهد حد مات
كلنا فى مشوار قريب والمسافة
من البداية للنهاية هى حبة ذكريات
ليست هناك تعليقات:
إرسال تعليق
اكتب تعليق