ما بين طرة وعابدين
الشكل واحد
والاسم انهم اتنين
واحسن شوف فى زاويتهم
يشوفوا المصرى متحير
يا متمرمط يا متورط
يا داخل حسبة الساكتين
يقولوا اتنين
نقول واحد
وراسم للبلد خطة
على سكة التايهين
وحاجه بجد مش نكتة
دايما فيه طرف تالت
اموت واعرف بيطلع فين
ودايما فيه قرف ثابت
يخيرنى ما بين وحشين
وكأنى مكنش فيه ثورة
وصوت الشعب
كان فى الصين
وغيرنا ما غيرنا
ولسه الجحر فيه تعابيين
يا غبى من الغباء نفسه
بتسمع مين
بلاش انت تكون نفسه
وترمى الذنب فى حسابك
ليوم الدين
خلاص فوقنا
معدش فيه ساكتين
قتلت الخوف وبتكلم
وعامل للشرف ميادين
ولسه بتسال مين
انا المصرى
سلفى اخوانى علمانى
وكل ملة ودين
وصوت المصرى
صوت واحد
وواحد بس مش سامع
ومش عارف بيسمع مين
لا هو شايف ولا متابع
يدوب تابع فى لعبت التخوين
انا المصرى لو سامع
بصلى الصبح فى كنيسة
واصلى الضهر فى الجامع
وبتقسم على الميادين
ليست هناك تعليقات:
إرسال تعليق
اكتب تعليق