عمك احمد بعد الثورة
..............................
..............................
عمك احمد اللى ساكت
من سنين
اللى ساكت حكمة منه
زى كل الطيبين
عمك احمد اللى قال
الكل واحد والبشر من اصل
طين
والهدف فى الاصل واحد
بس شلة كدابين
لسه بيحبوا الخيانة
لسه بيحبوا الاهانة
ولسه بيبعوا القضية
لصاد وسين
ولسه بيبوسوا الايادى
ولسه بينادوا الاعادى
لاجل شلة مفسدين
وعمك احمد اللى صابر
عمره كله
فى انتظار الحق يرجع
للغلابة الشقيانين
عمك احمد كل مصرى
لما حب يقول يا حقى
بس لسه فى ذهنه حيرة
يقول لمين
والمعارك ع الكراسى
والنخب تطرح مأسى
والوطن مش عارفه فين
عمك احمد اللى ساكت
بس لما يقول .حكيم
ليبرالية وسيرالية
طول ما فى امثال عكاشة
فى السياسة
يبقى وقعة مصر طين
واللى زيه كتير فى زنه
والغلابة ملخبطين
اللى قالك ليبرالية
واللى قالك اسلامية
واللى قالك عسكرية
حد قال الشعب فين ؟
عمك احمد كل مصرى
اللى طال الصبر عنده
وكل ليلة ينام حزين
وكل ليلة صمته قايل
وحدونا تكسبونا
الخطا ملوهش دين
هى عايزة مفهومية ؟
اللى جابوه الشعب يحكم
واحنا بعد الله معين
هو صوتنا لما يوصل
تبقى كارثة ؟
وانتوا بس معلمين
ما انتوا سبتوا الكراسى فاضى
والفراغ يحكم سنين
وشعبنا ساكت وفاهم
لكل زفة كدابيين
عمك احمد لسه فاكر
حزب واطى
ولسه فاكر ندل عاطى
لكل ندل يقول امين
ومش مهم الشعب فين
يا فلول لو تفهموها
الصنم بتاعكوا واقع
والشعب هو ابراهيم
شيلوه فى الحرام وروحوا
سيبوا شعب الشقيانين
نفسنا نتعب ونلقا
مش تعبنا لصاد وسين
هى كلمة حق منا
شعبنا عارف طريقه
ومش يخاف من نصابين
.......
............................
مصطفى الميرى
ليست هناك تعليقات:
إرسال تعليق
اكتب تعليق