تناقض لذيذ. .
..اهداء الى .الراحل احمد فواد نجم . ...
.تناقض لذيذ
شاب وعجوز
ودايما مشاغب
وحاضر وغايب
وحزنك وفرحك
لبلدك قرايب
تفارق سجونها
وترجع تروح
لحضن الغلابة
توزع نسيمها
تطيب جروح
يا غايب وحاضر
كانك فى رحلة
لحلمك وراجع
تكتب قصايدك
تصحى المواجع
وتقلق مضاجع
يا قاهر موانع
وكانك حابسهم
وحرفك براح
وكانك حارسهم
وعطيهم سماح
وكانك فارسهم
وراكب حصانك
وسيفك لسانك
ودايما غالبهم
وكاسب رهانك
ودايما مقاوم
ما تعرف تهادن
ما تعرف تساوم
وتفضل حروفك
لو غاب اللسان
تفضل بروحك
تلف الميدان
وساكن تمالى
فى قلب اللى كان
وتحكى لشبابها
حكاية زمان
بداية الشرارة
وصولا لبابها
نقل المرارة
لحلق الجبان
يا ساكن قصايدك
ابياتك بيوتها
ومصر القصيدة
وصوتك فى صوتها
تحس بامان
وتمسك حروفك
فى عطر المكان
وشكل الغلابة
وفصح اللسان
سفرك حقيقة
فسبنى دقيقة
احيي القصايد
وانعى اللسان
الف رحمة
يا نجم القضية
وصوت الحكاية
يا عاشق بهية
لحد النهاية
وساكن تمالى
فى كل اللى كان
يا سلام تسلم
ردحذفالله يسلمك يا استاذ مصطفى منذ فترة لم نلتقى فى عالم الواقع وكان القاء فى العالم الافتراضى الذى يلغى وحشة الاصدقاء ... نورت الصفحة يا استاذنا
ردحذف