ضربة كف 17
وريحة المستقبل بكرة
والأستاذ الوافق صاحى
ومصريسبلك شىء للذكرى
بضربة كف
يتشكل حرف الواو ويلف
وتسقط نقطة فى قلب النون
م الخوف بترف
ونقطة حبر تشد الهمزة
ف اخر السطر
زى الترسو فى اخر القطر
والأستاذ الواقف صاحى
يفتح حرف العين على بكرة
يجمع شمل اللام والميم
يعنى يدوب هاتخش الدنيا
وتبقى فى عدد البنى ادمين
وهاتفرد طولك مش مكسوف
من ضربة كف
هايوديك ع الفصل التانى
وكف فى كف النطق يخف
ينشف عود الجهل يجف
والأيام هادور دورتها
طبعا مش هاتبطل لف
وترجع تانى تخش الفصل
بس يكون وياك سبورة
واستفهام مرسوم مع القورة
تشرح للبنت الامورة
حرف الواو إزاى بيلف
وازاى تفتح بطن النون
وازاى تكسر عينها سكون
وازاى تكتب حرف العين
وتشوف بكرة ازاى هايكون
شفت الكف هايخدك فين
مع إني الشعر ابيض فى راسك
والمريلة مبقتش مقاسك
اتحداك
لو تقدر تنسى أول مرة
واقفت طابور
واول مرة دخلت الفصل
واول مرة انسبلك ذكرى
حتى ان كانت
ضربة
ليست هناك تعليقات:
إرسال تعليق
اكتب تعليق