طلة يناير ع الميدان
جايبة البشاير
راجعة بالحلم اللى كان
والفعل اكبر من الكلام
الشعب قام نزل الميدان
حط النسور فوق العلم
رفع الادان
والحلم جابه من العدم
لما الايمان لمس القلوب
صوت الادان وايا الجرس
والصوت على.. راح الخرس
والشعب قال نقدر نكون
احنا النظام واحنا الونس
وسع الميدان وكأنه قلب
يضمنا ويلمنا واجمل
ما فينا يبان هنا
كان الجرس وايا الادان
ايمان بوحدة ربنا
وبمصر واحدة تضمنا
وكان اللى كان
شفت الملايكة فى الميدان
يا كل ظالم مفترى
صحصح وصاح الديك
يا كل ظالم مفترى موتك
وشيك
الشعب حر الشعب مش
محتاج شريك
الشعب عنده عنفوان
يا كل واحد فى الميدان
انتوا الامل
وانتوا اللى جبتوا المستحيل
والمحتمل
بعيونى شايف ميت دليل
على عودة الحلم النبيل
جاى بايدين الشباب
وانا كنت فاكر حلمى خاب
ضاع من زمان
قبل الميدان
لكين فجر الحق بان
يهمس فى ودن للى اتظلم
وقع الصنم
رفع الادان فتح الميدان
بسم الشباب
وانا كنت فاكر شعرى شاب
وكنت تايه فى العدد
اتارى انا وانت وهما
مش تلاتة فى الحساب
يد واحدة قلب واحد
قلب مصر
واتفتح للعزة باب
والنهاردة احنا اتولدنا
بايد ولادنا فى الميدان
واتولد العدل فينا
يبقى راح الظلم كان
وانتهى عصر الكلاب
ليست هناك تعليقات:
إرسال تعليق
اكتب تعليق